Serata meraviljuża

Il-bieraħ mort ngħum ma’ wieħed qassis ħabibi.
Mort għall-quddiesa tas-18:30 fil-parroċċa tiegħu. Wara, kif kont qed nistennih ġiet mara b’mejda f’idha u qaltli/stednitni/ordnatli ngħinhom itellgħu l-imwejjed għall-pasta night li għandhom għada. They DO have a way to involve people. Assumejt li l-fund raising hu għal xi sett gandlieri tal-fidda; hu merieni u qalli li għall-pittura tal-koppla. Meta dil-pittura ssir, jien inkun ilħaqt soru. Meta ġie u rani niġri bl-imwejjed qalli “Ejja ħa mmorru għax għanda laqgħa ma’ l-arċisqof!” ?! Kif dħalt fil-karozza u xegħelt il-mobile, Madonna, nsib sms mingħand l-arċ! OMG!
Ma konnhiex nafu fejn naqdu mmorru u mbagħad issuġġerejt post (mhux se ngħid fejn, tifhmu għala aktar tard). Għal mument ħsibt li mhux se togħġbu l-idea minħabba li kien pjuttost imbiegħed minn fejn konnha. Però ftehmna mill-ewwel u morna s’hemm. Biex wasalna kważi kissirna l-karozza, no problem. Il-post veru SABIĦ. Bla bram, nadif, kwiet. U bla nies. Kapixx għala mhux qed ngħid fejn?
Għomna xi siegħa, imbagħad għamilna xi siegħa nismgħu l-mewġ u nitkellmu u mbagħad morna ħadna ħobża biż-żejt. U qsamna nofs landa ġelat tal-bacio – id-darba li jmiss se jkolli żaqq daqshiex! Serata meraviljuża.

Kotba kotba KOTBA!

It-tieg tal-B

Fil-għodu kelli nqum għas-servizz ta’ San Ġwann. Taf x’ħeġġa! Immaġina purċissjoni ġo nofs Strada Merkanti u Strada Rjali il-Ħadd fil-għodu!!! Almenu kien hemm l-Arċ biex jgħollili ftit il-moral. Waqt il-qari wieħed mill-kavallieri qara qari b’ieħor! Imbasta ta’ l-Ordni, biex probabli anqas imorru quddies! Tse!
Wara l-ikel ta’ nofsinhar irqadt raqda tajba u mort għat-tieġ ta’ B. Ipparkjajt ħdejn il-knisja parrokkjali ta’ San Ġiljan u tlajt bil-mixi (qlajt il-bażwa) sal-knisja ta’ Lapsi. Kif dħalt kien hemm sagirstan u staqsejtu (biex inkun ċert) jekk hix il-knisja ta’ Lapsi. “Le! Din l-old parish church of St Julian’s!” “Iva, imma magħrufa bħala ta’ Lapsi, hux?” “Ħażin jekk magħrufha hekk. Din ta’ San Ġiljan! Allaħares ikunu jafu l-Ingilterra li jsejjħulha ta’ Lapsi…” (L-Ingilterra fejn tidħol, pray?) Għal mument niżżilli msarnejja ġo saqajja għax ħsibt li mort knisja b’oħra. Imbagħad rajt isem l-għarajjes fuq id-djarju tal-knisja u ġejt f’posti. Daħal seminarista ieħor, kuġin ta’ B, li kien għamel sajf San Ġiljan. Dan mill-ewwel sellem lix-xiħ u staqsieh kif inhu. U beda jeqred u jgerger li ra l-gwerra u ma nafx x’ra aktar u għadu ħaj.

Il-quddiesa kienet sabiħa ferm. L-unika kanna li konnha s mmutu bis-sħana – għax is-sagristan ħalla fann fuq l-artal, imma li l-wire tiegħu ma jwassalx sa fejn kien hemm id-dawl mal-ħajt. Grrr… Għall-ewwel darba, qrajt vanġelu f’quddiesa ta’ tieġ, fuq ordni tal-qassis.
Wara kellna l-party f’Torre Paulina. Ħadna ħafna gost. Domna sa l-aħħar. Erġajt iltqjat ma’ ħafna nies minn tal-fellowship. Ġeddidna koċċ memorji. Iddiskutejna xi kanen li ġew maż-żmien… imma ħadna pjaċir. Fl-aħħar iltqajt ukoll ma’ waħda nurse li kienet ġiet miegħi Palermo l-ewwel darba… Anqas għaraftha!!!

Lejliet San Nikola

Oħo, beda sew l-istaġun tal-festi! U bdejna bit-tajjeb għax kelli żewġ stediniet f’daqqa. Biex ma niġġieled ma ħadd mort l-ewwel ftit għand min stedinni t-tieni, imbgħad mort il-bqija tas-serata għand min stedinni l-ewwel.
Is-serata bdiet billi mort smajt quddiesa s-Siġġiewi stess, xejn xejn nara naqra l-knisja armata verament sabiħa, mhux hekk? Il-kanna hi li ma lħaqx nieħu ritratti. Qaddes il-Faħal, priedka tajjeb ħafna. Wara l-quddies ġie jkellimni l-ministru ta’ l-Edukazzjoni… kemm jiena POPOLARI!!! U mbagħad dħalt ġos-sagristija npaċpaċ mas-saċerdoti u s-seminaristi t’hemm. Wara dan, mixja s’għand sieħbi tal-kors Varistu u għamilt hemm xi nofs siegħa. Meta beda n-nar tlaqt, mixja oħra sal-qalba tar-raħal sad-dar cinquecentesca ta’ Fanny. Peress li dal-għodu (l-ewwel ġurnata tal-vaganzi) qomt b’infezzjoni f’widnejja u t-tabib tani koċċi antibiotics oħra, ma stajtx niehu grokk tal-birthday. X'taghmel? Imma l-kumpannija kienet sabiħa.
F’xil-23:30 morna naraw iċ-ċikċifogu. Fil-pjazza ltqajta ma godz Palermo ppl – veru bla ħsieb. Ħadna ħafna pjaċir. Sirt naf li Debbie u Nigel ġa se jkollhom tarbija. Dott, ħi!

In-nar kien verament sabiħ. L-irdieden ħadmu kollha u kienu oriġinali. Pollon niżlet tistaħba ma’l-art f’xi tnejn. Eħħ...

L-ewwel laqgha ma' tas-Summer Club

Mela… fil-għodu spiċċajna s-Seminarju (trawma biex niżżilt kollox) u fil-għaxija erġajt mort Ħ’Attard għax kellna laqgħa tas-Summer Club (l-ewwel waħda għalija, it-tielet waħda għalihom). Insomma, wasalt kmieni u l-madam ta’ l-iskolasajf kienet għadha ma ġietx. Ġew xi għalliema oħra u ma għarafniex lil xulxin. Imbagħad ħarġet il-parish office secretary u qaltli: “Mr int mhux għas-summer club? Mela għax ma dħaltx?!” Insomma b’xi mod ħarġet li jien is-seminarista li se nkun magħhom. Għamilna nofs il-laqgħa npaċpċu fuq il-festi tan-naħat tagħna. Ara veru dinja oħra. Il-laqgħa ħadt pjaċir – hemm programm varjat u interessatni.
Wara stednuni noqgħod għall-KPP. Bqajt hemm bit-tama li l-kappillan jinduna bija u forsi niftiehmu xi ġurnata meta jispjegali x’se nħawwdu dis-sena. Rani, xejjirli, talbni l-mobile u daqshekk. Eħħ…
Il-laqgħa tal-KPP kienet… differenti milli niftakarhom l-Imqabba. Ir-raħal konnha nkunu xi tużżana madwar mejda niddiskutu. Ħ’Attard konnha xi 30 ġo AV hall, b’mejda għaċ-chairperson, is-segretarja u l-persuna li jkollha xi input x’tagħti, bin-nies jgħollu idhom biex jitkellmu, biċ-chairperson iżomm l-ordni eċċ. Ok, xi affarijiet huma in komuni. Il-colmo intlaħaq fl-aħħar meta, waqt li kienu qed jiddiskutu (bla ma’ jilħqu qbil) dwar ir-rigal tal- Ġinġer, qamet waħda u b’eċitament kbir waqqfet il-laqgħa biex thabbar li binha bgħatilha sms minn Luxemberg biex jinformha li Blair se jsir Kattoliku. OMG. That, thankfully, put an end to it.

100

Bil-kemm indunajt! Wasalna fil-blog numru 100! Nittama li issa li lħaqna numru daqshekk tond u sabiħ ma jfettillix nieqaf ħesrem kif kont għamilt wara l-blog numru 2 sena ilu. M’għandix ħsieb li nagħmel hekk ta. Mur żommhom lill-fans kieku! Ġa irċevejt diversi complaints għax kultant qed indaħħal biss it-titlu u l-kliem inħallih għal wara. Kien hemm ukoll min bgħat emails ta' protesta jgħid (tgħid) li d-daily gossip sar neċessità għalih (għaliha) waqt il-ħin tax-xogħol (trid tieħu break, mhux hekk?), kif ukoll fans oħra li l-blog għalihom sar item ta’ letteratura reliġjuża (!?) għal kull fil-għaxija. We-ell… assolutament ma kelli l-ebda idea li dal-blog se jkollu konkorrenza daqshekk qawwija u varjata. Inwiegħedkom li kemm jista’ jkun inkompli nipprovdilkom tbissima għal kuljum. Jew kważi.

Jibda l-assedju

Lura d-dar wara t-trauma li tiżvojtja l-kamra tas-Seminarju (KIF jidħlu daqshekk affarijiet ġo kamra daqshekk żgħira!?). Hemm tibda t-trauma akbar li terġa tħott kollox u tara fejn se ssib post biex iddeffes l-imbarazz u l-kotba li jkunu akkumulaw matul sena sħiħa. Biss dis-sena għandha kamra ġdida fejn nitfa’ l-imbarazz!!!

L-ewwel li ġieni f’rasi kien li naqbad dawk it-tliet xkejjer programmi tal-festi li ilhom sena fil-gallarija u nitfa’ lilhom l-ewwel fuq l-ixkafef il-ġodda. U hekk għamilt. Ġurnata sħiħa ndaħħal il-programmi u nifridhom festa festa. Meta kollox kien lest anqas ridt nemmen bl-ammont li kelli. 99 festa differenti, b’diversi festi li kellhom aktar minn pubblikazzjoni waħda. Naħseb li b’kollox hemm aktar minn 200 soċjetà jew parroċċa mdaħħlin. L-aktar programm awtentiku antik li għandi huwa dak maħruġ mill-parroċċa tal-Ħamrun għall-festa ta’ San Gejtanu 1970. L-aktar programm photocopied antik li għandi huwa dak tal-festa titulari ta’ Santa Marija ta’ l-Imqabba 1956. Biex frixthom użajt tliet xkafef mad-dawra kollha tal-kamra. Tgħidli qalbi meta se nqiegħdhom f’posthom mhux se jidħlu fil-biċċa li għandi allokata għalihom…

Il-last night... u ta' wara

Bħal kull sena, fl-aħħar lejl tas-Seminarju kellna l-famuża last night night celebration. Naħseb li fis-6 snin li ilni hemm din kienet l-aktar waħda tajba li kellna. L-ikel kien tajjeb ħafna (insomma, dwar l-ikel tal-parties qatt ma kelli xi ngerger…) il-Bunny qagħad isajjar. Għandu don għall-kebabs. Il-logħob kien tajjeb ukoll. Jien ħadt sehem fil-logħoba li nieklu tuffieħa minn ġo bieqja dqiq bla ma mmissuha. Kiltha (imma ma rbaħtx). Magħha blajt nofs id-dqiq li kien hemm u spiċċajt b’ħalqi għaġina. Terrible. Imma dħakna. Ir-ritratti li ħaduli jiswew il-flus. It-tug of war kellu konklużjoni mhux mistennija. Kien hemm seminarista dejjem serju li ġietu l-idea li meta ta’ kontrihom jiġbdu, huma jitilqu l-ħabel. Hekk għamlu u persuna importanti spiċċat fl-art u ħabtet rasha… Il-ministru tas-saħħa tgħidx kemm xejjer idejh u waħħallu silġ ma rasu…
Il-video presentation ta’ din is-sena kienet oriġinali. Anke dak li ġara wara. Mela peress li r-rev. Guggu kien il-kap tal-GĦK, kien f’idejh li jagħmel il-video ta’ din is-sena. Kellu idea tajba li kienet tikkonsisti f’li jagħżel grupp ta’ seminaristi u jippreżenta storja taparsi sen’oħra se joħorġu għall-elezzjoni bil-partit Sunflower Party. Kollox kien mibni fuq script tajjeb ħafna u mżewwaq b’ħafna ritratti minn din is-sena. L-idea li ingħatat tiegħi mill-għażla ta’ dar-ritratti kienet li jien xi ċuċ li nagħmel reklam tal-mapep tal-Girgenti u li jien kriminal li nittortura lix-xjuħ u lill-irjus tal-pupi. La nsib ir-ritratti npoġġihom.

Ara veru jrid ikollok DON biex jirnexxilek tidħol ġol-basal b’dal-mod.

Otium delictibus!

Il-ġimgħa li għamilt is-seminarju wara li spiċċaw l-eżamijiet kienet ġimgħa… differenti. Kelli ppjanat li nikteb l-artiklu għall-programm tal-festa ta’ Santa Marija. Ħa. Kelli wkoll nittraduċi mill-Ingliż għat-Taljan poster fuq kif jispiċċa l-ġisem ta’ min ipejjeb biex tintuża għal-life skills mat-3a f’Palermo. Ħa ħa ĦA!
Il-ġimgħa kienet bażikament maqsuma bejn baħar u sodda. Aktar sodda milli baħar. Għar Lapsi kien sabiħ, ħlief meta kien hemm il-mewġ ‘il ġewwa u kien hemm naqra minn kollox jgħum f’wiċċ l-ilma.
L-ammont esaġerat ta’ rqad kien mhux tas-soltu… Boq. Naħseb li l-antibiotics li tani t-tabib kienu naqra qawwijin wisq u spiċċajt iddowpjat b’overdose! Imma nsomma, l-aqwa li striħajt. Ma nistax nimmaġina meta nista’ nerġa’ nagħmel xi ġimgħa oħra hekk.

17 ta’ Ġunju – il-festa tal-Madonna tal-ġilju

Peress li l-bieraħ domt sa tard nara n-nar, illum ma qomtx daqshekk kmieni… fil-fatt qomt f’xit-8:15 u tani estru għax il-quddiesa tibda fid-9:00.

Meta wasalt il-knisja u ċċekkjajt li kollox kien tajjeb u li kulhadd kellu ktieb minn fuq xiex isegwi u li l-letturi eċċ. kellhom dak kollu meħtieġ, kien hemm Marì li qaltli prosit tal-quddiesa tal-bieraħ… anke bil-lejl waqt in-nar kien hemm partitarja oħra li rringrazzjatni… meta staqsejthom x’kien hemm speċjali ma riedux jgħiduli… l-affari tinten. Naħseb għamilt xi foul x’imkien.
Insomma, il-quddiesa kienet sabiħa ħafna u l-paniġierku kien tajjeb. Fr Charles fih ġabar it-tagħlim kollu dwar id-Domma ta’ l-Immakulata. Għoġobni.

Wara konna mistednin sal-każin tal-Soċjetà fejn ingħatajna drink u wrewna l-fażi tax-xogħol kif inhi miexja. Mill-qrib l-istatwi u l-figuri ta’ mal-faċċata huma aktar impressjonanti. Ma nafx kif kelli l-kuraġġ noħroġ fuq l-iscaffolding f’għoli ta tliet sulari b’xejn xi jżommni ħlief l-ixkora li qed tgħatti l-faċċata!

Fil-għaxija l-Għasar mar tajjeb u l-purċissjoni wkoll. Apparti problema ma’ persuna li tqabbdet toqgħod hemm tqassam iċ-ċraret lil min jidħol liebes indeċenti u ċ-ċraret baqgħu maqfulin fil-kaxxarizz, u l-fatt li ma kien hemm ħadd għassa ma’ l-affarijiet ġo knisja miftuħa minn kullimkien. L-antifona dis-sena ndaqqet meta l-vara tpoġġiet f’postha flok x’ħin kienet dieħla. Xi moda ġdida bil-barka tal-kappillan.

Lejliet il-festa - 16 ta' Ġunju 2007

Filgħaxija mort għall-għasar u għall-quddiesa ta’ lejliet il-festa unika f’pajjiżna ddedikata lill-Madonna tal-ġilju. Waqt l-għasar qgħadt nintona l-antifoni (oho!). ħadt gost nara lill-abbatini jippruvaw isegwu minn fuq il-ktieb sakemm qatgħu qalbhom u tefgħuh fuq is-siġġu.
Il-mużika kienet sabiħa, avolja orgni biss.Wara mort għal pasta night fund raising għall-grupp Viva s-sajf tat-tfal ta’ Bormla. Ħadna pjaċir. Wara qgħadt nitkellem ma’ wieħed minn sħabi ta’ Palermo u ġeddidna koċċ memorji. Wara rċevejt messaġġ mingħand Rod li kienu r-raħal ifittxuni. Mort s’hemm u sibthom bla taħbit. Ħadna pjaċir nara in-nar, speċjalment in-nar ta’ l-art (ma’ kull raddiena Pollon u Rod bdew jinżlu kokka ma’ l-art bil-biża’ li ttir xi biċċa raddiena fuqhom!). Domna sa xis-1:00 flimkien, imbagħad ftehmna li l-mtg li jmiss se jkun lejliet San Nikola għand Fanny!

Irtir

Is-Sibt li għadda kellna rtir tal-kors mal-kappillan ta’ Ħal Safi. Veru kienet esperjenza sabiħa u mhux tas-soltu. Ħadna lil Dun San Ġorġ bħala mudell. Il-laqgħa għamilnieha fil-kappella ta’ l-Assunta u wara l-ħin ta’ riflessjoni (b’differenza!) morna sa Ħal Far kilna ikla fenek imsajjar fuq il-ħatab. Kien tajjeb da morire.

finals, adieu!

Il-ġurnata kienet sabiħa! Ehm, bdiet sabiħa.
Morna għall-eżami u ma ħadt XEJN miegħi ħlief biro u lapes. Dħalt għall-eżami qisni xkora nervi se jisparkjaw, rajt il-karta u qbadt intiha ż-żejt. Kienet ċara ħafna u veru ma kellniex għalfejn ingergru. Insomma għamilt sa l-10:06 (mid-9:15) nieħu n-noti u mbagħad qbadt nikteb qisni għandi x-xjaten jiġruli wara l-pinna. Għall-ewwel bdejt nitfa’ dettalji ta’ qżież, imbagħad, lejn l-aħħar, qtajt qalbi u bdet nikteb żewġ linji fuq kull tema biex illaħħaq. Naħseb li għamilt karta tajba.
Wara l-ikel morna ngħumu – l-ewwel għawma tas-sena. Għar Lapsi kien mill-isbaħ, u ma kienx hemm folol ta’ nies li ma jkollokx fejn tħalli l-basket.

Fil-għaxija mort għat-tridu. Il-quddiesa kienet sabiħa, bil-priedka fuq il-qalb ta’ Ġesù peress li llum taħbat il-festa tiegħu. U waqt il-funzjoni ta’ wara żanżanna l-kotba li ħejjejt jien bil-liturġija. In-nies donnhom apprezzawhom għax użawhom u segwew minn fuqhom. Ir-rettur tal-fratellanza ġie jirringrazzjani.
Intanto kien hemm xi ħbieb li marru saż-Żejtun għall-marċ ta’ l-aħħar tridu. Mid-dehra xi każin minnhom waħħal xi bust mal-faċċata li ġibed ħafna attenzjoni. Meta rajt ir-ritratti li bgħatuli fhimt il-għala. M’hawnx ieħor bħalu (u nittama li ma jkunx hawn).

Ġurnata orrenda

Illum kienet ġurnata fejn qabżitli bl-ikrah! Ir-riħ li donnu qabadni minn nhar il-Ħadd ‘il hawn donnu qaleb għall-agħar għax qed iħeddilni u t-tqaħqiħa dejjqitni. Biex tgħaxxaq wara l-ikel qabadni s-sulluzzu u għadu ma għaddilix! Uff. Ippruvajt nistrieħ ftit darbtejt forsi nħossni xi ftit aħjar imma għalxejn. Anqas haqq il-ħin li ħlejt nitqalleb ġos-sodda! Kieku mhux għax nhar il-Ġimgħa għandi l-karta tal-Morali kont immur s’għand it-tabib. L-istudju dejjaqni wkoll. Iff, qisu ma jrid jidħol xejn!!

L-unika waħda tajba tal-lum kienet email li bgħatitli oħti dwar il-gallarija – għax il-bieraħ indunajt li kien hemm żewġ bozoz neqsin u li l-bqija kienu mħawwdin… Din hi l-email.

Konna qed nieklu u smajna il-banda fil-bogħod u iddeċidejt li immur nixgħel il-gallarja just in case…[unqoted text dwar il-qagħda tar-raħal] Waqaft niekol u tlajt nixgħel. Dehrli li smajt paq u naħseb irreġistra li splodiet xi bozza oħra (nothing new)…erġajt inżilt niekol. 10 minuti wara (konna għadna ma spiċċajniex nieklu) nisimgħu il-banda wara l-bieb – ġirja għal ġol-parapett [unqoted text fuq xi vecchia fiamma]. Irreġistrali li kien hemm ftit dawl u ħsibt li peress li il-bozoz tal-kulur ma jurux ħafna imma ħriġt rasi biex nittawwal and HORROR OF HORRORS kienu mixgħulin biss dawk ta fuq il-bieb… u minnhom kien hemm xi 2 homor (eeeek) mort nistaħba. Il-ma kien ħa jtiha ħass ħażin u qalet li aħjar ma xgħelna xejn! (Do you blame her). Sadattant għaddiet il-banda u in-nies. Back to eat. Naħseb li il-bieraħ il-pa irranġa xi ħaġa fihom…saru technicolour iktar milli kienu…u il-blu xorta mhux qed jixgħelu!

© Frances C Farrugia

Il-programm mużikali tal-Banda Lily

Il-bieraħ, bħal kull sena, kont mistieden u attendejt għall-programm sbiħ ferm li l-għamlet il-Banda Lily fl-okkażjoni tal-festa tal-Madonna tal-Ġilju li se tiġi ċċelebrata fir-raħal nhar il- Ħadd li ġej. Għad-differenza ta’ snin oħra, dis-sena kelli post fl-ewwel ringiela, maġenb il-kappillan. Ħadt pjaċir. Naħseb li mużikalment u bħala eżekuzzjoni l-isbaħ silta kienet il-concert overture Romantica tas-surmast Joseph Darmanin, il-fundatur tal-Banda, li miet is-sena l-oħra. Dis-sena ma kienx hemm nar sinkronizzat mal-mużika – ħasra, għax kont inkun qed nistennih. In-nar li kien hemm dis-sena kien bħala għeluq ta’ waħda mis-siltiet, dik b’selezzjoni ta’ diski tal-Queen. Tutto sommato ħadt pjaċir – u l-ambaxxatriċi li kien hemm tkellemt tajjeb ħafna.

Corpus et sanguinis Domini

Illum il-Knisja ċċelebrat is-solennità tal-Ġisem u d-Demm ta’ Kristu, magħrufha bħala Korpus. Hija festa li hi għalqalbi ħafna…

Fil-għodu kelli servizz il-Belt, imma bdilt ma wieħed biex mort l-Imdina minflok, bit-tama li ndumu inqas. Spiċċajna biex DOMNA ĦAFNA – tal-Belt waslu lura qabilna. Eħħ… min jixtieq id-deni lil ġaru jiġi f’daru…

Fil-għaxija nżilt sar-raħal u ħadt sehem fil-quddiesa u l-purċissjoni t’hemm ukoll. Kienet sabiħa ħafna. Intużat għall-ewwel darba l-isfera l-prima ta’ l-1754 minn mindu ġiet irrestawrata u bbanjata mill-ġdid. Għaddejna minn rotta itwal minn tas-soltu – il-kapo messu jgħaddi l-purċissjonijiet kollha minn hemm, mhux naqra kemm induru mal-pjazza qisna l-boloh. Hu qal li jixtieq, imma tal-każini ma jknux iridu…

Wara mort sa għandu mal-patri li ġie jmexxi l-festa u paċpaċna ftit fuq tazza Sprite.

L-ewwel wieħed ġewwa

Il-ġurnata naħseb li bdiet tajjeb għax tant irqadt sew li ma ridtx noħroġ mis-sodda. Qabel tlaqna rnexxieli nerġa’ ngħaddi l-punti prinċipali. Waqt li konnha sejrin irċevejt messaġġ ta’ awgurju mingħand xi ħadd li mhux suppost kien qed jibgħat il-messaġġi. Bgħattlu lura li napprezza u li ħasra li ma kienx hemm il-bieraħ għax kienet veru sabiħa. Reġa’ wieġeb li ta’ nhar il-Ħadd kienet ħafna isbaħ. Mmmm… Hawn ċerti nies jaħsbu li jekk tiftaħ ħalqek qed tagħmel hekk bil-ħsieb li tigdimhom… (mind you, ġieli jkun il-każ, imma mhux dejjem! Gott!) Insomma bgħattlu lura li aħjar ikompli dak li suppost qed jagħmel għax “nidħol għalik minn ġot-telefon!”

L-eżami naħseb li mar tajjeb. Weġibt il-mistoqsija li kienet ixxebbaħ lil Ġesù ma’ Mosè, mal-profeti u ma’ l-għerf. Ktibt 16-il paġna eżatt. Il-prepost persważ li l-essay li ktibt se tkun dik li tiddetermina d-dottorat. Boq. Xi nies one track minded. Issa naraw. Żgur li waqt l-eżami kont kalm ħafna, minkejja li għamilt mid-9:20 sa l-10:10 nikteb il-punti u mbagħad għamilt sagħtejn u ħames minuti nikteb bla ħniena. Issa naraw x’joħroġ.

Fil-għaxija mbagħad bdejt id-domma. Ommi! Iġri tgħaddi.

lejliet l-ewwel final... il-pjaneta tal-papa... il-quddiesa fuq il-fosos...

Bħalma wieħed jista’ jobsor, illum kienet ġurnata ta’ turment psikoloġiku KBIR. Kultant tippreferi li meta nidħol norqod jumejn qabel eżami, nqum dakinhar ta’ l-eżami. Lejliet hija l-agħar ġurnata. Insomma, għamilt ġurnata naqra u nerġa’ naqra (sakemm kont letteralment se naqla’) n-noti ta’ l-Iskrittura. Qabżet bl-ikraħ, tant li meta sar fil-għaxija u kelli ninżel għall-quddiesa fuq il-Fosos ħadt ir-ruħ. Barra minn hekk il-ma llum kellha tmur sa Brussel tiltaqa’ ma’ oħti l-kbira. X’ħin VERU ma kelli aptit xejn, bgħatt messaġġ lil oħti biex nara kienetx waslet. Kienet għadha anqas biss telqet minn Malta. Ehm…

Fil-għaxija tlaqna mis-Seminarju f’xis-18:00. Solennità u decorum? Ma jeżistux. Kulħadd bit-T-shirts u bis-staten ġol-basktijiet tal-plastik, għax peress li konnha se nibdew San Ġwann u se nispiċċaw fuq il-Fosos, għedna li aħjar ma nħallux bagalji hemm. Mela kollox ġol-basktijiet tal-plastik ħalli mbagħad kemm nitfgħuh f’but.

Wasalna kmieni, bħas-soltu. Kien hemm konfużjoni ta’ qassisin TAL-BIŻA’ – kien qisu meta kien se jiġi ordnat l-arċisqof. F’xis-19:00 bdiet miexja l-purċissjoni minn San Ġwann għal fuq il-Fosos. Peress li jien kelli servizz ta’ liber, kont wara nett, ma’ l-arċisqof. Meta ġejna biex noħorġu aħna, naħseb li s-salib kien ġa wasal Putirjal daqs kemm kien hemm saċerdoti.

Mela ħareġ l-arċisqof ma’ żewġ djakni Għawdxin (għax tagħna JAĦASRA qiegħdin irtir - njh njh njh) u kellu fuqu pjaneta oranġjo. Bla ma tajt lili nniffsi biżżejjed ċans nirraġuna x’kont se ngħid (kultant il-ħbiberija ddaħlek fil-basal) għedtlu:
“Eċċellenza! Kont naħbek għandek gosti aħjar fil-vestwarju!”
Pawlu ma deherx taken aback u kien pront qalli: “Din libisha l-papa!”
“B’daqshekk ma jfissirx li hi sabiħa, eċċellenza!”
OMG! Oh MY God! Oh my GODDD! Veru każ ta’ I put a deeper meaning to “FOOL”!
Insomma l-arċ daħaqha u komplejna qisu qatt ma kien xejn.

Il-quddiesa kienet sabiħa ħafna, esperjenza li veru ma ninsiha qatt. Il-Fosos kien maħnuq bin-nies. ĦAFNA. Kien qisu meta ġie l-papa (forsi mhux daqhsekk, imma qrib). Minn kull fejn għaddejna: fil-Belt, fit-toroq, fit-terminus, fuq il-Fosos… iċ-ċapċip ma’ qata’ xejn. In-nies veru daħlu fiha din il-kanonizzazzjoni. J’Alla tħalli l-frott spiritwali mixtieq.

Illum ħabat koċċ riħ sew (kien hemm żewġ bandalori kważi qalgħu l-arblu b’kollox) u meta r-relikwija bid-demm ta’ Dun Ġorġ tpoġġiet fuq il-pedestall li tħejja għaliha kienet se ttir. Kellha tinstab soluzzjoni malajr… u being Maltese kien hemm xi saċerdot li ġab biċċa tape tad-dawl u rabatha mal-pedestall bih! Induratura?

Waqt li l-arċ kien qed jagħti l-barka ta’ l-aħħar (u jien kont quddiemu bil-liber) il-mob beda jivvibra ġol-but. Imnalla kien fuq is-silent għax kont nagħmel figura ta’… FOSSA. Kienet oħti l-kbira biex tgħidli li l-ma ma ntilfitx u li kienu qed jieklu f’lukanda European standard! Il-ħsieb li l-lejla kelli nikkuntenta b’hamburger mingħand iz-Zagallo ma tantx għen…

Skoprjet faċilità ġdida fil-WinDVD Creator!

Illum ġurnata storika! Kont qed inpaċpaċ ma’ Dun Mikiel tal-vocations u qalli li xtara biċċa apparat qisha external drive li teħel mat-tower permezz ta’ USB, u li fiha xi phonos li jeħlu mal-video u li bija tista’ tikkopja video direttament fuq DVD bla ma jkollok tissavejah fil-PC. U l-aqwa waħda hi li anke meta t-tape ikun xi ftit imgerfex jew mgħaffeġ, is-sync ma tintilifx! Bomba! Kont ġa bdejt naħseb met se nkun nista’ naqbeż qabża sa l-iScan biex nixtri waħda.
Meta kont fil-kamra qiegħed mill-ġdid ngħaddi xi video għal ġol-PC (naħseb li kienet l-opra Don Giovanni. Bħalissa tant qed jaħdem bla ħniena li tlift il-kont), ftakart li l-programm li għandi jien fih option “Capture straight to DVD” li qatt ma kont użajtha. Ippruvajtha u ħadmet!!! Ehmm... messni xtrajtha! L-ewwel DVD li ħraqt direttament mill-video għad-DVD kien il-pontifikal solenni ta’ nhar il-Ħadd li għadda li fih il-Papa Benedittu XVI ħabbar l-ewwel qaddis Malti. Bix-xieraq, hux?

Fil-għaxija kellna l-għasar għall-‘festa’ ta’ San Ġorġ Preca. Proprjament mhix festa, imma hi ċ-ċelebrazzjoni Nazzjonali u Djoċesana li fiha l-Arċisqof jippreżenta l-qaddis il-ġdid lill-poplu Malti. U ovvajment, la dan hu l-ewwel qaddis, allura kollox sar naqra bil-kbir.
Minn Għawdex ir-relikwija ttieħdet fil-knisja tal-Vittorja l-Belt, u telaq korteo minn San Ġwann (magħmul mit-terzjarji Karmelitani u mill-kapitlu tal-kolleġġjata ta’ San Pawl) u mar hemm iġibha. Fil-bieb ingħatat lill-Arċisqof li tela’ biha sa fuq il-presbiterju. Imbagħad kien hemm xi forma ta’ Exsultet f’ġieħ San Ġorġ Preca, kantat minn Said-Pullicino (twil xi kwarta) u mbagħad għasar kollu kantat. Kien Gregorjan bil-Malti, u kien sabiħ ħafna. Imbagħad omelija… u nsomma. Domna minn xil-17:30 sa xit-20:00. Ma bsartx li se ndumu daqshekk. Imma kien sabiħ.

uuuuuuuUUUUUFFFFFFFFFFF!

Beda dak iż-żmien terribbli ta’ matul is-sena... jew aħjar ta’ matul darba kull tliet snin! Huwa ż-żmien li (wara li għamilt li kors tal-Marjoloġija u tkellimna fuq Adrienne Von Speyer) insejjaħlu “all expectancy” bħalma kienet il-Madonna qabel Pentekoste. Id-differenza hi li Mary kienet qed tistenna l-Ispirtu li permezz tiegħu saret Omm il-Knisja… jien qiegħed nistenna li nkun bil-qiegħeda quddiem il-karta tal-finals, jew (aħjar) li nkun ħiereġ ‘il barra wara li nkun temmejt tliet siegħat ta’ tortura psikoloġija u fiżika, li normalment issarraf f’kallu tal-qaddisin u fi qtugħ ta’ laħam f’subgħajja l-werrej ta’ idi l-leminija u tentazzjoni KBIRA li naħraq in-noti u li nersaq qrib kull flixkun spiritwali li nara. [Nifs.]
Insomma, it’s that time of the year again.

U tiskanta kif kollox jinqala biex il-ħin jinħela, anke li jiġik f’moħħok li tistampa n-noti kollha p.es. tad-Domma (u tistamphom miż-żewġ naħat ħalli ma taħlix karti, u mbagħad li toqgħod tqassamhom u tisseparhom bid-dividers u tilleghom biex ma joqgħodu jiġru… u għaddew sagħtejn!). Imbagħad, ovvja, la qed joqrob iż-żmien, jiġik f’moħħok li tmur sa photocopy bureau f’Raħal Ġdid (għax irħas minn dawk ta’ ħdejn l-Università) biex tistampa l-kotba tal-liturġija tal-festa tal-ġilju li ilek taħdem… eħm… fuqhom sena sħiħa. Qabel dan trid tagħmel il-proof reading u tara li kollox aligned kif suppost (għaddiet siegħu nofs oħra). La irħas, dak ta’ Raħal Ġdid kien imballat, u peress li int nisrani tajjeb toqgħod fil-queue mhux tipprova tqabbeż kien jagħmel ħaddieħor (47 minuta oħra). Kif jgħaddi l-ħin? Get the gist of it?
Intanto ħraqt id-DVD tal-programm Bandalori 2004: festa ta’ Santa Katarina, iż-Żurrieq u tfajt fil-PC l-videos ta’ I 100 cavalieri (1964) u episodju minn Storie dell’anno 1000 (1970).

DVDs... u studju

Illum kienet ġurnata boring to say the least. Issa li l-eċitament kollu tal-kanonizzazzjoni għadda, erġajna ffaċċjajna r-realtà.. realtà li fiha martell enormi li kull tant ħin iħabbat waħda fuq rasna. Il-martell jismu FINALS. Il-ġurnata għaddejta nistudja l-punti ta’ l-iskrittura u bdejt id-Domma. Illum għamilt l-ewwel parti mill-Christian Anthropology. Uff.
Li kien fiha tajjeb kien li matul il-ġurnata l-video u l-PC ma waqfux. L-ewwel daħħalt il-programm tal-festa ta’ Santa Katarina (iż-Żurrieq) mis-sensiela Bandalori (Super One TV 2004), imbagħad daħħal l-ewwel u t-tieni parti tat-TV film Jason and the Argonauts (Hallmark 2000) u mbagħad ġie l-Bunny u tani A child called Jesus biex nagħmilulu. Ħabat tajjeb għax il-video li għandi jien kellu biċċa nieqsa – issa għandi kollu!!!

Fl-aħħar… SAN ĠORĠ PRECA… l-ewwel qaddis MALTI

Illum huwa jum ta’ ferħ kbir għall-Gżira tagħna. Malta llum rat lil wieħed minn uliedha mogħti l-għola ġieħ li jista’ jingħata. Malta llum rat lil wieħed minn uliedha jiġi ppreżentat lid-dinja bħala mudell ta’ ħajja nisranija. Malta llum rat lil wieħed minn uliedha jiġi ddikjarat QADDIS mill-Qdusija tiegħu l-Papa Bendittu XVI.

Il-pjazza tal-Vatikan kienet għasra minħabba x-xita li kienet nieżla, imma xorta waħda dan ma qatax il-qalb ta’ ‘l fuq minn 5000 pellegrin Malti li mar hemm jingħaqad mal-bqija tan-nies biex jassistu għal dan l-avveniment storiku.

Aħna li bqajna Malta rajna kollox ġo l-AVR flimkien mal-Viċi u mas-sorijiet. Il-Viċi rama l-inkwadru ta’ Dun Ġorg u r-relikwija biex inkomplu nżidu ma’ l-atmosfera. Meta l-Papa qara d-digriet tal-kanonizzazzjoni lkoll kemm aħna qabżitilna demgħa. Veru kienet sabiħa. Ovvjament, jien naħseb li konnha f’pożizzjoni aktar komda minn sħabna li kienu Ruma – almenu rajna kollox ċar u mill-qrib u ma sirniex flieles. Madankollu naħseb li hemm kien hemm atmosfera sabiħa wisq ukoll. L-għajjat ta’ “Ġorġi! Ġorġi!” li ŻGUR oriġina mis-seminaristi ġibed l-attenzjoni anki tal-Q.T. li tbissem tbissima veru ġermaniża u dar iħares lejn in-naħa minn fejn kien ġej l-għajjat. U l-Q.T. seraq qalb kulħadd x’ħin beda jitkellem bil-Malti (eċċellenti!) u qalilna biex inżommu lil San Ġorġ Preca bħala mudell għalina u biex bħalu nsiru ħbieb ta’ Ġesù.

Il-prepost kien jidher qisu se jmut bl-eċitament (nittama li kien libes il herr binde). L-iżmagu kien gustuż iżomm ktieb ikbar minnu. U kemm jaf iżomm serju! Ir-reverendudu l-vanġelu kantah sew – u dik it-tbissima li dejjem ikollu fuq wiċċu ma kienetx hemm… mmm…

Wara kellna pranzu babaw. Almenu ċċelebrajna kemm stajna to the full.

Viva San Ġorġ Preca!

Meta tkun veru XeJnSeW.com.mt

Illum waħda minn dawk…
Illum lejliet il-kanonizzazzjoni ta’ l-ewwel qaddis Malti – Dun Ġorġ Preca, profeta qabel żmienu u fundatur tas-Soċjetà tad-Duttrina Nisranija. Għalhekk ħsibt li aħjar ninżel id-dar għal ftit ħin kemm indendel mal-gallarija il-poster ta’ Dun Ġorġ li kienu ħarġu ma’ gazzetta nhar il-Ħadd li għadda. It-temp kien tal-biki – nisperaw li Ruma ma jkunx hekk għada.

Insomma, mort għand tal-ħanut biex niġbor il-poster (wara li suppost ġbartu l-bieraħ imma bi żball ta l-affarijiet li kien refa’ għalija taħt l-isem ta’ J. Farrugia lil xi waħda jisimha Joanne Farrugia – imma ddubbali ieħor, so no problem) u bqajt sejjer id-dar. Kif wasalt sibt biċċa chip-board kbira ftit aktar minn A1, naddaftha u waħħalt il-poster magħha. Mort sa għand tal-ħanut biex nixtri biċċa kartonċina safra u bajda biex niksi l-biċċa njama li baqgħet mikxufa. Kien magħluq. Mort lura d-dar, sibt biċċa kartonċina ċelesti u użajt lilha. Fuqha waħħalt il-kliem “Sinjur Alla, bierek f’mewti r-ruħ tiegħi”, meħudin mill-Quotidie.

Waqaft ftit mix-xogħol u mort saż-Żurrieq nagħti l-alba tal-Ġinġer biex iz-zija tħitli bħalha. Qgħadna npaċpċu ftit u qaltli li l-bieraħ rat Xarabank mill-Vatikan wara li ġiet mill-Wied. U qaltli “X’ħin beda jġib il-koppla ma bediex iġib il-qamar fuqha? Dak kif wasal sa Ruma? Kont għandi kemm rajtu l-Wied!” O MY G. Taħlita ta’ astronomy u physics, zi ruħi.

Lura d-dar waħħalna l-poster u bdiet nieżla x-xita. Poġġejna biċċa plastic fuqu, imma bdiet ittir. Erġajna qlajnieh u għattejnieh b’biċċa plastic u waħħalnieha miegħu. Imbagħad bdilt il-bozoz ħomor tal-gallarija biex nagħmilhom kollha bojod – u jkunu lesti għal tal-ġilju wkoll. Waħħalthom u xegħlthom – kollha ok. Il-kamin ħafna aħjar mill-bayonet!

Inżilt isfel nissettja l-video biex inkun nista’ nirrekordja xi programmi għada u sejjħitli oħti.

“Int baħnan?”

“!?”

“Nieżla x-xita u tħalli l-bozoz mixgħulin? Faqqgħu nofshom”

OMG! Tlajt fuq biex nara. Kien hemm bozza waħda li splodiet u ma kien baqa’ xejn minnha. Oħrajn kienu jidhru b’biċċiet neqsin. Id-dear xegħlet il-gallarija mill-ġdid biex nara liema kienu għadhom tajbin u splodiet oħra. GOTT! Qlajna l-plug u neħħejt il-bozoz kollha li nfaqgħu. Minn 30 kien baqa 12 sħaħ. Grr… Ġibt il-bozoz li kien fadalli u sibt li ma kienx baqa’ waħda mġiddma bajda. So iddeċidejt li nkun innovattiv. U għamilt il-faċċata karnival. Fin-nofs hemm tliet bozoz bojod u tlieta oħra sofor (bandiera tal-papa), imbagħad fuq kull naħa waħħalt 2 ħodor, 2 ħomor u 2 bluni. L-aħħar tnejn ħajjethom bojod. Meta waqfet ix-xita xegħlthom. Waħda mill-blu kienet maqtugħa. Mort naqla’ ta’ pariġġa biex nitfa’ tnejn oħra bojod u l-bluni npoġġihom waħda f’kull tarf. It-tajba waqgħet sular u saret melħ. Hmpf!
Mort fuq it-tromba ntella’ il-bandiera. Il-ħabel kien marbut ma musmar daqshiex fuq il-bejt. Erġa’ inżel, ħoll, erġa itla. Tellajtha u l-ħabel tħabbel. Waqt li kont qed nniżżilha biex intellgħha sew qamet bufura, tajjret il-bandiera u kważi tajjret lili magħha minn fuq it-tromba tal-bejt. Tellajtha, ma stajtx norbotha u ddendlet. Erġajt tellajtha u qgħadet f’postha. Naħseb se tibqa’ tperper sa tal-ġilju!
Issa li jonqos hu li xi ħin iċempel il-mobile u xi ħadd mill-parenti jgħidli li l-poster bl-injama b’xi mod inqala’ minn mal-grampuni tal-gallarija, waqa’ u kisser xi karozza. Jew qatel lil xi ħadd.

Spiċċajt biex għamilt id-dar mill-11:30 sas-18:30 u ma waqafx minuta! Tistgħu tobsru kemm studjajt!

Ħela ta’ ħin u Xarabank mill-Vatikan

Illum, lejliet il-viġilja tal-kanonizzazzjoni, b’Seminarju kważi vojt kelli ġurnata… ehm… differenti milli kelli dan l-aħħar. Nista’ nammonta għal madwar nofs siegħa studju b’kollox. Kien hemm xi sagħtejn u nofs irqad, ħafna (ĦAFNA) ġiri barra, u xi editing minn videos għal DVDs. Illum għamilt La Traviata (Teatro La Fenice 1982) u kważi spiċċajt Sleeping Murder. Il-lejla se naħraq it-tieni parti tal-programm Forċina tal-festa ta’ Santa Katarina 2000. Barra minn hekk fost il-ġiri li kelli, mort sal-Librerija Preca u xtrajt sett ta’ bolol li ħarġu fl-okkażjoni taċ-ċentinarju tas-Soċjetà tal-Museum u d-DVD tal-funeral ta’ Dun Ġo… San Ġor .. il-Beatu… whatever.
Fil-għaxija kienet okkażjoni ferm rari fejn rajt Xarabank sa l-aħħar. Kien minn Piazza San Pietro u kien jitratta fuq Dun Ġorġ. Ara biex irnexxielhom jagħmlu programm minn hemm veru jirnexxilhom jagħmlu kollox! Kien interessanti, u l-intervisti kienu sbieħ. Li kien hemm verament ridikolu kienu l-inserts ta’ l-‘aħbarijiet’ mill-ħajja ta’ Dun Ġorġ matul is-snin. L-‘intervisti’ ma’ Dun Ġorġ u mas-soċi jmorru għal kollox kontra l-ispirtu ta’ l-ewwel snin tas-Soċjetà għax huma ma kienux jitkellmu fil-pubbliku dwar dak li kien isir fl-Oqsma. + l-għażla tal-ħwejjeġ tal-ġurnalisti kienet kerha. Eż dik li ġiet tħabbar il-mewt ta’ Dun Ġorġ kienet liebsa qmis sewda u ngravata kbira safra. Shocking.