Floss Nights!!!

Il-ġimgħa l-oħra ż-Żurrieq, raħal twelidi, kien hemm il-festa sabiħa ħafna tal-Madonna tal-Karmnu. U din is-sena ċċelebajtha ma sħabi b'mod bħal qatt qabel.
Meta kont żgħir u konnha għadna noqgħodu ż-Żurrieq niftakar li kien hemm regolamenti strettissimi dwar is-sehem tagħna fil-festi. Fil-każ tal-festa ta' Santa Katarina konnha obligati (volenti o nolenti) li mmorru l-funzjonijiet kollha tal-knisja u għall-marċi kollha. M'hemmx diskussjoni. L-unika ħaġa li konnha nagħmlu bil-qalb kienet li nitfgħu il-karti u l-bżieżaq mill-bejt fil-marċ tal-Ġimgħa meta kienet tgħaddi l-istatwa ta' Vincenzo Cremona minn quddiem id-dar taz-zija, tan-nannu u taz-zija l-oħra, u anke l-għada fil-marċ ta' filgħodu.
Fil-festa tal-Madonna tal-Karmnu, ir-regolamenti kienu kemmxejn... diversi... Konnha mmorru DEJJEM Ħadd qabel il-festa naraw il-ħruġ tal-vara tal-Madonna mill-oratorju, konnha mmorru għat-tridijiet kollha u għall-purċissjoni. Imma bla ċapċip, għax xi 40 sena ilu ommi u z-zija (li jisimha Katarina!) qalgħu daqqa ta' xemgħa mingħand il-fratelli waqt il-purċissjoni peress li, ladarba razza ma' Santa Katarina, ma kellhomx dritt iċapċpu lill-Madonna. Ideat. U minn dik is-sena ħadd ma reġa' ċapċap.
Fejn jidħlu l-marċi u l-każin kien hemm veto assolut. L-unika konċessjoni kienet li meta kien jgħaddi l-marċ minn quddiemna kont niftaħ il-bieb u nagħmel purċissjoni żgħira bi statwa tal-Madonna tal-karmnu mal-kuritur sal-bieb u kont naħdimha biex tasal fil-bieb hekk kif il-banda tasal quddiemna. Mhux għax kienu jagħtu każ ta. Imma nsomma. Imbagħad kont indawwarha u nidħol lura ġewwa.
L-istorja tal-familja vis a vis il-festi għandha, naturalment, storja antika, b'xi miti wkoll. Fis-snin 20 u tletin tas-seklu l-ieħor mid-dehra kien hemm rivalita' bejn il-każini li tħabbatha ma dik li hemm illum, jew kienet agħar. Kien iż-żmien meta jekk partit iwaħħal stampa tal-qaddisa/Madonna tiegħu man-naħa tal-każin oppost, l-istampa kienet tispiċċa trietaq. Imma nsomma, kollox jgħaddi. Kont nisma lil oħt in-nanna tgħid li darba l-kelba ta' nannuha jew missierha, marret iddur bħalma soltu tagħmel. U daħlet il-każin tal-Istilla. Meta l-buż/bużnannu sar jaf, lill-kelba samatha. Shocking. U minn dak iż-żmien l-ebda membru tal-familja ma reġa' daħal ġol-każin tal-Karmnu.
L-affarijiet bdew jinbidlu meta kelli xi 12-il sena u dħalt fratell mal-Fratellanza tal-Madonna tal-Karmnu. Komplew jinbidlu meta dħalt is-seminarju u bdejt nitla' għall-ħruġ tal-vara waħdi sa fuq iz-zuntier u baxx baxx inċapċap. B'ħafna kawtela ma mmurx naqla' xi xebgħa. Minn meta qaddist sirt nidħol fl-oratorju qabel ma toħroġ il-vara u nieħu ritratt magħha kull sena, u fuq iz-zuntier naħraq idejja nċapċap. U anke meta tkun dieħla l-purċissjoni, avolja nkun qed nakkumpanja. U hekk is-silġ dwar iċ-ċapċip inkiser.
Rigward il-veto fuq il-każin, dan beda jixxaqqaq xi ftit fl-2001 meta bdejt nikteb fil-ktieb tal-festa u kelli ta' bilfors nieħu l-artiklu u r-ritratti (id-digital u l-email kienu għadhom mhux moda) lill-editur. Fl-2006 things changed even more għax oħti ż-żgħira, is-sopran, bdiet takkumpanja l-Banda Queen Victoria (tal-Karmnu) bil-kant meta jdoqqu fil-festa tal-Assunta fl-Imqabba. U għalhekk kellha ta' bilfors tidħol il-każin għall-kunċerti.
Il-veto tal-marċi kien għadu ma ġiex breached ħlief xi kultant meta ommi kienet titla' tara l-marċ ta' filgħodu dieħel u tlajt magħha xi darbtejn. Xi 4 snin ilu tlajt kif spiċċa l-marċ tal-Ħamis jew tal-Ġimgħa (insejt) u, erm, domt hemm sa xi l-4:00 sakemm veru bdejt nara l-istilel. U nżilt id-dar b'imsarni ġo saqajja għax assumejt li kelli nsib raġuni valida x'nagħti lil ommi għala domt barra sa dal-ħin fil-pjazza taż-Żurrieq fil-ġimgħa tal-festa tal-Istilla. Imma laħqet raqdet.
Din is-sena mxejna pass ieħor. (Proprjament naħseb qbiżna mill-irdum, imma nsomma.) Is-sezzjoni żgħażagħ Karmelitani ħarġu bnadar bil-Madonna veru sbieħ. U xtrajt waħda. €40 għal Alla u għall-erwieħ (u għal buthom, ovvja). Lil ommi għoġbitha u ħietitli bordura bajda biex tikber ftit u biex ma ssirilhiex ħsara bir-riħ. Fis-16 ta' Lulju (festa liturġika), fis-17 (meta ħarġet il-vara taż-Żurrieq) u fl-24 (nhar il-festa taż-Żurrieq) tellajt mal-arblu l-bandiera l-impittra tal-Madonna bil-faxx ikħal.
Din il-ħaġa kkawżat naqra furur. Mhux mill-familja tiegħi ta. Il-ġara tuwha tal-ġenn għax tiegħi kienet isbaħ minn tagħha. Iz-zijiet qaluli nniżilha għax kien ir-riħ. Koċċ nies saqsewni min pittirha għax veru sabiħa. U ċ-ċirasa ta' fuq it-torta kienet meta waħda min-Nigret (karmelitana DOK) marret issaqsi lil ommi jekk biegħejniex il-post "għax intom ma' Santa Katarina u rajt bandiera tal-Madonna mal-arblu!" Ommi bid-diplomazija kollha kollha qaltilha li mal-arblu ttella' li trid u li l-Madonna hi tagħna daqs kemm hi tagħhom. Kienu jien kont inżid xi żewġ aġġettivi, imma never mind. Issa rrid nara x'se ntella' f'Santa Katarina għax waħda mpittra m'għandix!
Mit-Tnejn sal-Ħadd kellna ġimgħa floss nights and one floss afternoon.

Nibdew bid-definizzjoni: Floss nights huma serati festivi fil-festa tal-Madonna tal-Karmnu fiż-Żurrieq (mill-ewwel kelma tal-antifona tal-Madonna tal-Karmnu: Flos carmeli). F’Settembru, fil-festa ta’ Santa Katarina jkollna l-Vox nights (mit-tieni kelma tal-Innu tal-għasar ta’ Santa Katarina: Catharinae vox triumphum). Il-membri tal-klikka huma prattikament jien, il-manager, il-printer, l-avukat (li jżomm ma’ tal-Karmnu, imma s’issa kull sena bil-frosta kellu jiġi magħna anke ġol-każin ta’ Santa Katarina), l-avukata, il-perit u mbagħad dejjem jingħaqad magħna xi ħadd ieħor. Il-Floss nights huma nnovazzjoni ta’ din is-sena, għax is-soltu lil sħabi tihom il-Vox nights u biżżejjed. Dis-sena ftehmna jien u l-manager għall-floss nights u STEDINNA lill-avukat (= assolutament ma kienetx idea tiegħu). Imbagħad għedna lill-oħrajn. Il-printer u l-perit ġew kważi kuljum, l-avukata (li żżomm ĦAFNA mal-prinċipji tagħha) ġiet il-Ġimgħa (b’running commentary divertenti ħafna ta’ “m’għandhomx ħi!” meta wieħed innoċenti minn barra r-raħal saqsiha fuq l-istatwa tal-marċ, u “birng the deck-chairs” meta f’nofs il-lejl infetħet l-umbrella ġganteska f’nofs il-pjazza) u l-marċ ta’ filgħodu biss. Imma l-klikka li konnha veru ħadna pjaċir.
Jien intfajt fuq Coca-Cola, 7 Up et al. Darba, waqt marċ kbir u mill-isbaħ, l-avukat mar iġibli beverage u ġie bil-Bitter Lemon. Seta’ jibgħatha bil-posta. Imma xorta ddivertejna. Wara l-marċi dejjem bqajna hemm xi ftit aktar ħin/siegħat – xi drabi anke fil-każin tal-Istilla. It-Tlieta konnha aħna l-aħħar nies li ħriġna mill-każin. Jekk tkun taf ommi taqtagħni mill-wirt. Never mind. Fit-triq bejn il-pjazza u d-dar kellna diversi diskussjononijiet ILLUMINATI dwar San Ġwann Battista u Santa Tereża ta’ Avila, speċjalment bil-mod kif huma raffigurati or lack of. Insomma kienet ġimgħa veru mill-isbaħ u li ma stennejtx li se nieħu daqshekk gost.
Nhar il-festa mort għall-quddiesa kantata – kienet sabiħa u wara għall-ikel u mbagħad għall-marġ (floss afternoon). U bqajna hemm sa siegħa qabel l-għasar. L-avukat tah li jrid imur għall-għasar u għalhekk bqajt bla siesta. X’tagħmel? Il-ħmerija li hu stess ġie nofs siegħa tard. Nifhem li n-Nigret jinsab fejn ħalla l-karkura x-xitan... imma NOFS SIEGĦA?! Il-manager marret kunċert ta’ Santana (jew Sant’Anna. Jew Satana. Ma nafx) u ġiet f’xi 0:00. Morna ħadna beverage u kebab u we called it a night.
Ġimgħa memorabbli! Iġri terġa’ tiġi tal-Karmnu!

Sectarian imbecillity

Mela dakinhar/dak il-lejl tal-festa liturġika tal-Madonna tal-Karmnu kelli esperjenza li ejjew ngħidu ma kontx qed nistenniha.

Fil-għaxija mort inqaddes in-Naxxar għax is-saċerdot li kien imissu kellu tieġ band'oħra. Il-quddiesa marret tajjeb (naħseb) u wara dħalt fis-sagaristija biex ninża'. Kien hemm skoss saċerdoti għax wara l-quddiesa tiegħi kien hemm tieġ. Il-prim ċelebrant kien patri Karmelitan Skalz (bil-Malti Tereżjan), li kien qed jinsisti mas-sagristan biex itih pjaneta sabiħa (nothing bad in that. Jien ħadtha drawwa li kull fejn immur nieħu pjaneta tiegħi miegħi - u tiegħi KOLLHA sbieħ. Ħlief waħda - biex jekk dik li jħallili s-sagristan ma tkunx dinjituża, nuża tiegħi). Wara rani u bdejna npaċpċu. Meta rajt li hu donnu ma kellux għaġġla, u peress li jien ridt immur, bħal kull sena, għall-purċissjoni tal-Madonna tal-Karmnu, bil-pulit għedtlu li kelli mmur sal-Belt.

"Il-Belt?! X'hemm il-Belt il-lejla?"

Għal mument - ħaġa mhux tas-soltu - bqajt bla kliem. Imbagħad għedtlu: "Int Karmelitan!?"

"Le Tereżjan!"

"Mhux xorta Karmelitan!? Mela l-Madonna tal-Karmnu ma tiċċelebrawhiex!?!?!?!"

"Eh, iva! Illum tal-Karmnu!"

Mid-dehra dan ma kienx jaf li dak il-ħin stess x'ħin konnha qed nitkellmu patri Tereżjan ieħor f'Bormla kien qed jagħmel purċissjoni bi statwa ġdida tal-Madonna tal-Karmnu li kienet twila daqs il-purċissjoni tal-Immakulata darbtejn! U dawn għamlu żmien fl-istess kunvent.

Mort 'il barra ddiżgustat. Immaġina xi Nazzjonalist aħrax li jinsa jum l-Indipendenza, jew xi Laburist akkanit li jinsa l-Ħelsien jew ir-Repubblika. Jew xi Senglean jinsa l-Vitorja! U le! Tajjeb, mela l-aqwa li nilbsu l-pjaneti sbieħ, imbagħad is-solennitajiet tal-ordni nistgħu ninsewhom! Sooo disappointed.

Prova...

Storja hafifa ta' dal-blog: dan kien beda xi 5 snin ilu meta kont ghandi seminarista. Ghamilt xi sena nuzah u mbaghad waqaft. Ergajt ghamilt xi zmien qasir nuzah u ergajt waqaft. Imbaghad bdejt il-blog l-iehor ta' Ruma li kellu success enormi u dan prattikament insejtu. Kien hemm xi drabi meta bi zball tfajt xi haga go fih flok fl-iehor, imma xejn specjali.

Issa, ladarba l-qarrejja tal-blog l-iehor kienu se jaghmlu sajf bil-viztu habba li fis-sajf il-blog jieqaf (heqq avventuraROMANA jismu wara kollox) hsibt li nerga' nibda nuza dan kultant biex naghti xi updates fuq aneddoti tal-hajja ta' kuljum, issa ta' qassis (mhux aktar seminarista) li qieghed id-dar bil-'vaganzi', jipprova jaghti daqqa t'id f'xi parrocci fejn hemm is-sacerdoti bil-vaganzi u fl-istess hin jipprova jahdem ftit fuq it-tezi... issa naraw x'gej.

Min jirnexxielu jaqra dan il-messagg jekk joghgbu jhallili nota biex inkun naf li issa hu accessibbli - mid-dehra meta kont waqaft nuzah kont nehhejtlu l-access...

Beatus Johannes Paulus Maior

Visit msnbc.com for breaking news, world news, and news about the economy

Joseph filii David....

Illum San Ġużepp! Minkejja li dis-sena nsejt narma l-istatwa ġimgħa qabel bħas-soltu u armajtha l-bieraħ f’xil-23:30, il-festa ta’ San Ġużepp kellha bidu mhux tas-soltu.

Dis-sena l-vara ta’ San Ġużepp f’Ħal Kirkop tagħlaq 125 mill-miġja tagħha minn Marsilja. U naturalment il-Ġużeppini Koppin ħadu l-okkażjoni biex jiċċelebraw ftit aktar mis-soltu l-festa liturġika. Saru l-eżerċizzi fuq San Ġużepp il-ġimgħa l-oħra (u spiċċajt tapp flok il-kelliem nitkellem dwar San Ġużepp bħala l-patrun tal-mewta t-tajba), il-bieraħ għamlu akkademja mużikali u llum għandu jsir pellegrinaġġ bl-istatwa.

Il-bieraħ kont mistieden għal diversi raġunijiet:

1. għax niktbilhom kull sena fil-ktieb tal-festa,

2. ħabba li mort tajt waħda mil-laqgħat ta’ l-eżerċizzi u

3. għax kien hemm oħti tkanta mal-banda.

Ħadt pjaċir. Il-mużika kienet sabiħa, il-knisja kienet armata sabiħ – insomma dik l-istatwa ssebbaħ kull fejn tkun (bla ma nnaqqas mill-merti lill-istatwa ta’ San Leonardu li wkoll hi sabiħa ħafna). F’nofs l-akkademja nkixef il-pedestall li għadu kemm ġie lura mill-induratura. Veru ġie sabiħ.

Wara morna sal-każin għall-kxif ta’ l-arkivju mużikali l-ġdid tal-banda. Minn fejn kont ma rajt xejn. X’tagħmel? Rajt, iżda, l-istatwi l-antiki taċ-ċeramika li kienu jintramaw fil-pjazza fl-imgħoddi. Sbieħ u rfinuti (fis-sens li mhumiex figolli bħal diversi statwi li naraw jiġru mal-pjazez u t-toroq), imma mill-qirb jidhru naqra grotteski... naħseb min ħmiehom ma kellux f’moħħu l-grazzja li s-soltu tkun attribwita lill-persunaġġi Bibbliċi. Imbagħad ħrabt għax kien hemm koċċ nies li nafhom u ma kellix aptit neħel. Bidu sabiħ. Naraw illum ikollix ċans immur sar-Rabat jew sa Ħal Kirkop.

Prosit father, tat-toilets!

Wara li qaddist tas-6:30, komplejt xi xogħol fuq it-teżi u rajt biċċa episodju ta’ OZ (għax il-bieraħ irqadt f’nofsu) inżilt biex immur l-Università. Kif kont sejjer navża l-arċ li tlaqt kien hemm xi nisa li ġew jinvistaw ir-Redentur li daħlu wkoll jinvistaw il-toilets il-ġodda li l-parroċċa għamlet xi ħmistax ilu. Kien hemm folla ta’ xi ħamsa jagħlqu l-kuritur jistennew wara bieb magħluq.
“Naħseb m’hemm ħadd sinjura.”
“Le father, magħluq,” qaltli waqt li ġibdet il-bieb, li ma tħarrikx.
*sigh*
“Timbuttah trid, sinjura għax kieku għamilnieh jinfetaħ għal barra kemm nies ikunu qed jistennew jispiċċaw b’wiċċhom mifqugħ b’xi daqqa ta’ bieb.”
Ippruvat timbotta. Nies ta’ fidi żgħira! Irrid navża lis-sagristan iwaħħal tabella tgħid PUSH.
“Ara! Dan jinfetaħ ‘il ġewwa!!” X’ċuċ hu Colombo?
U ovvjament kulħadd nesa l-bżonn li sa ftit sekondi qabel kellu, waqt li kulħadd daħal jammira r-refurbishment.
“Prosit father!!!”
“Ta’ xiex?” Sadattant kont għadni qed nipprova naqbeż il-folla biex nitlaq għall-Università. Taf int, student mudell bħali (bil-B.A. Hons., B.A. Theol. & Hum. Stud. u S.Th.B.) ma jkunx irid jasal tard! Inħassar il-kondotta b’sakrileġġ bħal dan!
“Tat-toilets!”
“Mhux jien waħħalhom. U anqas ħallasthom” (fil-fatt naħseb li saru bi sponsor!).
“U iva fr, imma lilek qed naraw! Veru sbieħ u komdi!”
“Ara Grace, hawn wieħed ta’ l-irġiel u wieħed tan-nisa! Prossittt!”
“ħeħe” Immaġinani nidħal għal xi ħaġa daqshekk divertenti.

Imma rriżulta li din fil-fatt kienet l-aktar ħaġa pożittiva tal-ġurnata, għax mort l-Università u l-burdata tad-daħk malajr telqet għax tlajna għalxejn minħabba nuqqas ta’ ftehim ċar min-naħa ta’ xi ras kbira. GRR.

Viva St Paddy! (tinqara GUINNESS)

Illum San Patrizju! Il-qaddis li kkristjanizza l-Irlanda. U ħafna għadhom sal-lum jimxu fuq l-eżempju tajjeb li tahom, għax ghadhom KATTOLIĊI!!

Ftit jafuha l-istorja tat-tifel Skoċċiż li ġie misruq u meħud l-Irlanda bħala lsir, li mbagħad kiber, ra f’ħolma d-destin tiegħu li jevanġelizza l-Ingilterra u l-Irlanda, ħarab sar saċerdot u isqof u mar lura jwettaq destinu. Patrizju dam 33 sena jgħallem u sa dak iż­-żmien l-Irlanda kollha kienet saret nisranija. It-tagħlim tiegħu baqa’ sod, in-nies baqgħu jgħożżuh bħala patrun tagħhom tant li l-Irlandiżi rrifjutaw li jiksru l-kuntatt ma’ Ruma mete Enriku VIII waqqaf il-komunità ekkleżjali Anglikana. Prosit Pat! Tina ftit mill-ispirtu tiegħek!

U la qed nitkellmu fuq l-ispirtu, kif tista’ ma taħsibx fl-Irlanda u ma tifktar f’xi pub tal-birra? U jekk is-somom nafu nagħmluhom: Irlanda + pub + birra = GUINNESS!!

Dis-sena l-birra għalqet 250 sena u għalhekk il-produtturi għamlu festa twila ġimgħa (qisha l-festa tar-raħal!!) fejn koċċ pubs madwar id-dinja taw il-Guinness bi prezz speċjali u qassmu l-famuż kappell Irlandiż lil kull min ħa pinta Guinness.

Illum kellna t-tieni laqgħa ta’ l-eżerċizzi għaż-żgħażagħ ġewwa Senglea. Konnha l-klikka ta’ nhar ta’ Tnejn, xi 2 oħra, 2 ħbieb tiegħi minn barra l-Belt u koċċ tf.. adolexxenti. Il-kelliem uża koċċ stejjer mill-Bibbja għat-tfal (mela mhux 15+ !?) u bena l-laqgħa fuqhom, bażikament li lkoll mistednin nilqgħu l-imħabba ta’ Alla fil-ħajja tagħna bħalma għamlu Samwel u Żakkew biex il-ħajja mejta tagħna tieħu l-ħajja mill-ġdid bħall-għadam fi żmien Eżekejl. Inpoġġu fil-ġenb il-fatt li jekk l-għadam kollu li hawn mas-saqajn jew midfun jieħu l-ħajja mill-ġdid ikollna problema. Insomma, f’nofs il-laqgħa kważi kilt wieħed għax kien qed jgħaddi ż-żmien b’kollox. U jkolli ngħid li veru beżżiegħ għax meta rreferejt għalih qagħad jistaħba wara ras sieħbu. Bużżieqa. Naraw jerġax jiqażżes!

Wara l-laqgħa (li rnexxieli nibqa’ mqajjem matulha għax kont bil-wieqfa peress li kont għajjien u bil-ġuħ) jien u 5 oħra morna sal-Conqest Pub (li huwa supporter tal-Manchester United) fix-Xatt ta’ Senglea niċċelebraw lil San Patrizju b’pinta birra.

Il-kappell dam eżattament 112-il sekonda ġo rasi għax bdejn inħossni minus bih. Ma kienx hemm nies, imma taf int, trid iżżomm id-dekor anke quddiem il-ħbieb. Kellna diskursata nteressanti fuq il-kontraċettivi, l-abort, il-morali, il-kaċċa u ċ-Ċisk sakemm saru xi l-23:30. Sakemm indunajt li kont kilt id-dips kollha jien u xrobt il-birra fuq stonku pratikament vojt (veru li l-Guinness tant hi karka li qisek qed tiekol, imma nsomma). Sakemm indunajt li kont qed nara n-nies b’żewġ irjus. Sakemm ftakart li għada għandi tas-6:30!!!!!!!!!

Tutto sommato kienet serata sabiħa ħafna. Ħbiberiji antiki reġgħu issaħħu u kibru ħbiberiji ġodda. Dan kollu bis-saħħa ta’ San Patrizju. U diversi pinet birra. Għal sen’oħra Pat!

Il-kuntrasti tal-ħajja...

Il-ħajja mimlija kuntrasti. Bħal ngħidu aħna żewġ fliexken inbid. Immaġinak toħroġ filgħaxija u tmur mal-ħbieb tixrob xarba Chablis akkumpanjat minn salami and cheese salad bil-ftajjar għadhom sħan, u inqas minn tmien siegħat wara – meta tkun għadek bit-togħma tax-Chablis f’ħalqek u l-ispirtu tax-Chablis idur ġo rasek – issib li s-sagristan ippreparalek grokk inbid tal-bdiewa li l-kulur tiegħu biss ukoll ikabbarlek ulċera fl-istonku. X’tagħmel? Il-ħajja mimlija kuntrasti.

Meta mbagħad tkun ġejt vulgarment imqajjem fis-2:36 ta’ filgħodu minn ragħda ta’ dimensjonijiet gargantwi (bl-inglix ngħidu gargantuan, bil-Malti ma nafx x’tiġi) tant li taħseb li sploda xi vapur fil-baċir ta’ wara l-bażika, jew li taret xi kamra tan-nar, jew li sploda xi tank tal-gass, jew inkella li waqgħet il-bażilka (li hija problema AKBAR minħabba li d-Domus Curialis hija bieb ma’ bieb magħha...) taf int... tgħid, “Ok. Il-bieraħ ixxalajt, illum storja oħra.”

U wara din il-qatgħa jkun hemm xi devota (għax dejjem nisa jkunu) li ċċempel fil-5:09 biex tara (please note) bħal-lum ħmistax fi x’ħin hi l-purċissjoni tar-Redentur tgħid, “Ok. Se tkun ġurnata iebsa.”

U mbagħad wara dan kollu ssib il-Farmers wine. U jkollok bil-fors tammetti li wara telgħa jkun hemm niżla, bla tumbati, u li tispiċċa xi sular jew tnejn aktar ‘l isfel minn fejn tkun bdiet it-telgħa. Got the point?

Bħalissa s-13:38 u għalhekk se mmur nipprova nirkupra dak li tlift dal-lejl. U nippova ninsa x’ġara mill-aħħar tazza Chablis s’issa, forsi nkun nista' nikkwota lil Christine Baranski f'Mamma Mia: "[This morning] never happened. I have thrown a veil over [this morning]."

Qaqoċċ u l-NSO...

Mela, la qiegħedin fir-Randan, is-soltu l-menù tad-dar idaħħal xi varjazzjonijiet biex kemm jista’ jkun jiġu evitati l-laħmijiet! Fosthom xi ikla tajba qaqoċċ. U llum konnha qed nieklu qaqoċċ. Wara ħasla mingħand oħti għax skond hi kont qed naħli nofs il-weraq, oħti l-oħra, id-dr, ġietha l-idea grandjuża li tistaqsi “Tgħid xi ħadd kif ġietu l-idea li jiekol qaqoċċa?”

Naħseb li l-classification li qed tgħallem qed titlagħlha għal rasha.

IMMA l-effett li kellha żgur il-mistoqsija tagħha kien li għal mument mort lura l-mogħdija tal-evoluzzjoni diversi millennja u ħassejtni xadina qed tiekol werqa. Isa ħej! Dal-progress kollu biex xi ħaġa bħal qaqoċċa terġa’ ġġibna... XADINI! Imbasta d-degrees!

U la semmejna d-degrees...b’kumbinazzjoni xi 4 siegħat ilu ċempel wieħed ta’ l-NSO u qagħad isaqsi x’naħdmu, kemm studjajna eċċ eċċ. L-ewwel ħaġa li qalli kienet “Sur Farrugia, se noħodlok ftit minn ħinek” (aħjar qal, “ħa naħlilek siegħa minn ħajtek” għax kelli nispellilu l-indirizz u l-materja li studjat oħti). Staqsieni kemm għandhom żmien ommi u missieri għax mill-aħħar statistika li ħadu kibru (imnalla qalli). L-aħħar statistika kienet fl-2005 u staqsieni b’kemm snin kibru. Ta’ l-għaġeb. Għedtlu li missieri għandu 63 u ommi 62. Imbagħad dorna fuq oħti l-kbira u qalli, “Oħtok għandha sena hux?” Kont se ngħidlu “Adottawha jew?!” Mid-dehra meta ħadu l-istatistika fl-2005 u hi kienet għadha qed tistudja, li min ġabar l-informazzjoni immarka / ħdejn “età” u l-għaref li qrah iddeċieda li għandha sena. Għedtlu li għandha dottorat minn Cambridge fil-Haematology u qalli “skuża l-injuranza tiegħi u spellihieli.” M'hemm xejn bħas-sinċerità! “U inti sur Farrugia, skond l-istatistika int għandek degree, hux hekk?” “Għandi 3.” Ma ħadimx għalihom hu! Coming to think of it... il-parċmini naħseb ħaqqhom post aħjar milli jimteddu fil-qiegħ ta’ kexxun....

Wara hafna...

Kulħadd uman! U ċedejt għat-tentazzjoni li kultant inkompli nitfa’ xi ħaġa fil-blog li sentejn ilu kellu sequaela notevoli. (Xi żmien aqwa biex iċċedi għal xi tentazzjoni minn żmien ir-RANDAN?! OMG) Biss did-darba b’varjazzjoni żgħira. Mhux se jkun in public domain.... imma jkunu jistgħu jarawh the select few, l-illuminati, il-5%, l-Injostiċi eċċ eċċ eċċ, got the point? Mela jekk irċevejt l-invit, kun af li int wieħed/waħda minn dawn in-nies li veru nafda!

Insomma, il-ħajja kienet interessanti ferm mill-aħħar post li tfajt, li għall-informazzjoni ta’ kulħadd ma ruwha ħadd minħabba li ktibtha imma ħallejt il-blog mhux aċċessibbli. Issa tistgħu tarawha.

Il-ħajja ta’ qassis sabiħa u interessanti. Ħbiberija ma’ saċerdoti, kultant xi ħarġa ‘l hawn u ‘l hemm, tara d-differenza li biha jibdew jittrattawk ħbiebek (avolja għamilt minn kollox biex jibqgħu jarawni bħala dak il-ħabib kaxxa ġenn xEjN sEw li kienu jafu... imma naħseb li it goes with the job!)

Kien hemm min kien veru risky u rriskja jafdali t-tridu tal-festa jew it-traslazzjoni, jew il-viġilja jew il-paniġierku (OMG) jew il-purċissjoni. Timmaġinani fuq pulptu!? Kien hemm it-tridu ta’ San Bert f’Ħal Għargħur, il-purċissjoni ta’ San Ġużepp fil-Kalkara, xi quddiesa tal-kwindiċina fil-Gudja, it-traslazzjoni, il-viġilja, l-għasar u l-purċissjoni ta’ l-Assunta fl-Imqabba, it-traslazzjoni u l-viġilja ta’ San Ġiljan f’San Ġiljan (aka St Julians), il-purċissjoni ta’ Marija Bambina f’Senglea, il-paniġierku tal-Madonna ta’ l-Isperanza fil-Mosta, l-paniġierku tal-Madonna ta’ Loreto fil-Gudja u l-viġilja ta’ San Ġiljan f’Senglea. Imma nsomma, kollox għadda u kollox mar tajjeb. U hemm xi bookings għal dis-sena, fosthom il-paniġierku, l-għasar u l-purċissjoni tal-Madonna tal-Ġilju fl-Imqabba.

Bħalissa ninsab veru kuntent! Il-ħajja sabiħa u dejjem hemm xi ħaġa ġdida. Ovvjament dejjem ikun hemm xi ħaġa MHUX ġdida (bħal xi kanna), imma kollox jgħaddi. Kollox frugħa. Ok it-teżi qed taffettwani.

U speaking of it-teżi! Il-bieraħ kont sejjer għand iz-zija għall-kwiet biex inkompli naħdem fuqha. Tlaqt mid-dar u sakemm wasalt fit-tmiem it-triq (xi 10 metri bogħod) u sibt puncture. Bdiltu u l-istepney kienet imtaqqba wkoll. Grr. Qabbadt il-kumpressur u għamel nofs siegħa jagħti (għax intant ċemplet iz-zija ta’ l-Awstralja biex tagħti l-għomor lil ommi) u r-rota baqgħet ċatta ma’ l-art. Grr grr. Mort s’għand tal-punctures biex nibdlu (fuq rota ċatta) u ġibt ir-rota trietaq. Grr grr grr. Xtrajt rota oħra u sewwejt dik li kien baqa’ u mort għand iz-zija. U ma kellix ċwievet. Ok. That’s it. Il-bieraħ bla teżi. (Insomma mort fil-għaxija u komplejt xi ftit.) Mela bħalma għedt, il-ħajja dejjem b’xi ħaġa ġdida – min qatt ħa 2 punctures f’daqqa u mexa fuq wieħed sakemm ġab ir-rota żigarelli!?)

Gimgha qabel l-ordinazzjoni

ehh x'genn!!!
Illum kelli gurnata mimlija daqs bajda!
Fil-ghodu mort ghall-quddies (ma jsitax jonqos, ovvja). Wara kellu programm live fuq Radju Marija dwar il-vokazzjoni u l-figura tal-qassis fid-dinja tal-lum. Hadt pjacir. Wara mort sas-Seminarju - ghadni qed nimmisjah hafna dak il-post :(. Kelli xi xoghol tal-Melita Theologica x'naghmel ghax bdew dehlin ic-cekkijiet. Njh. Mort insellem lill-Vici ghax ma lhaqtx kellimtu nhar it-Tlieta. Wara girja sa Rahal Gdid nigbor habib u mbaghad girja ohra sa Portomaso ghal ikla ma' hbieb ohra. Ikla tajba. A lot! Imbaghad ma sibtx il-karozza. OMG! Insomma wara kocc tidwir gol-parking (I HATE car parks!!). Wara suppost kelli mmur il-bahar imma missier siehbi hassu hazin, so ergajt inzilt l-Imqabba u taparsi rqadt. Gibt 2 programmi li fihom ktibt!! Ta' l-Ghaqda ta' l-Armar San Nikola u ta' San Guzepp (Hal Kirkop). Nice. Nice. Njh.
Wara morna sa San Luqa naraw liz-zija. Tisab tajba - kellu bzonn tidra miskina.
Wara girja s'ghandi il-kappillan u ftehmna ma' tal-Kazini. Issa kollox f'postu. Nafu min se jdoqq quddiem u min se jdoqq wara, min se jibda min se jispicca ecc. Grazzi lil kulhadd tal-kollaborazjoni.
Wara mort sal-kappella tal-Maqluba ghal ftit hin ta' kwiet u ta' ringrazzjament...

La serata Dantesca

Il-party tal-berdej ta' Benny!

Njh njh njh. The terror is back!

Wara break pjuttost twil erġajt hawn biex inkompli nagħti servizz lis-soċjetà billi ngħolli l-burdati tan-nies.


Illum għadni ġej minn party speċjali!! In-Nunzju Apostoliku ta’ Malta li ilu hawn biss 4 xhur (u li l-ġimgħa l-oħra xkanajt quddiemu hekk kif spiċċajt id-diskors ta’ l-Akkademja ta’ San Tumas) għamel festin il-Corinthia fl-okkażjoni ta’ għeluq snin il-Papa. L-Eċċellenza Tiegħu kien fil-bieb jilqa’ lill-mistednin u kellu ex għalliem tiegħi ipespislu f’widnejn who is who. Kif ġejt jien qallu “Il presidente dell’Associazione degli studenti della Teologia, il reverendo Jonathan Farrugia.” Oho. Did-darba ma xkanajtx. Kulħadd kien hemm: l-isqfijiet, l-imħallfin, il-kanċilliera, il-President (u Mary), il-Membri Parlamentari, jien (ara veru kien hemm kulħadd mela!). Ħlief il-Papa. Stramba tmur għal party fejn is-suġġett ma jkunx preżenti. Insomma. L-ikel kien xi ħaġa ta’ barra minn hawn, kelli skuża ndum barra, stajt noqgħod inpaċpaċ ma’ koċċ niex importanti fuq il-blog ta’ Daphne, d-diskorsi kienu qosra u t-toasts ma bbastawx jieqfu. Xrobt xi 4 tazzi nbid żejda bl-iskuża ta’ hekk. Ħasra li s-sena l-oħra ma kontx mistieden...

-301: San Manju ta' Fussen

-302: Il-Beata Teresa ta' Kalkutta

-303 Santa Rosalia

Eħħ Rosy Rosy!! Kif nista’ naħseb f’Santa Rosalia (li tinqara’ Rosalìa mhux kif jgħidu xi wħud Rosàlia) u ma naħsibx f’Palermo! Fl-2002, 2004 u 2005 kont inkun f’Palermo fil-famuż festino ta’ Santa Rosalia patrona di Palermo, li jsir fil-15 ta’ Lulju, imma l-buzz ikun fil-lejl ta’ l-14. L-ewwel darba li kont hemm niftakhar li kien ħmar il-lejl kolossali fejn inqbadna f’rassa tal-biża’ (agħar minn tal-meetings jew tal-marċ ta’ fil-għodu tal-Ħamrun) u waħda minna fettlilha jħossha ħażin hemm. Imbagħad biex tgħaxxaq, wara li b’xi mod irnexxielna naħarbu u mmorru lura d-dar u norqdu, fl-3:45 bdew jaħarqu l-murtali li riegħedu d-dar tas-sorijiet. Anyway. Dik kienet l-ewwel esperjenza. It could only get better.

It-tieni darba iddeċidejt li jagħmlu x’jagħmlu sħabi jien se mmur nintefa’ ġo bar f’Via Roma u noqgħod hemm nixrob bil-kwiet. IMMA nzerta li l-kumpanija kienet ferm aqwa u ħadd as such ma kien interessat li jmur jara l-karru (għax flok statwa jkollhom karru enormi b’Rosy fuqu). U waqt li ma’ l-ispeakers mal-belt kollha xi kor kien qed ikanta “Rosa purissima guidaci” aħna konnha qed inkantaw (u nwettqu!) “Show me the way to the next whiskey bar”. Niftakar li l-għada sibt tazza ġol-basket li kont qed inġorr u li mort lura ndur il-ħwienet biex nara ta’ min kienet...

2005! Il-kumpanija kienet presso poco l-istess u kelli f’moħħi re-enactment tax-xalata ta’ l-2004. Però did-darba kellna magħna Palermitan li ddeċieda benevolment li jdawwarna dawra mal-belt proprju fil-lejl tal-festa. U waqt li fiċ-ċentru kien hemm il-festeġġjamenti, aħna konnha qed induru l-isqaqien u l-waħx naraw il-palazzi mwaqqgħin u fid-dlam. Niftakar li morna nixorbu f’bar jismu Le Cupolette sakemm Mary u Pollon iddeċidew li enough is enough u dorna lura, only biex inqbadna fir-rassa u kważi għaffiġna l-karru (li did-darba kien akbar mis-soltu). Orrajt, xi affarijiet darba biss jiġu tajbin.

Bil-ħaqq Rosalia kienet eremita tgħix fuq Monte Pellegrino. Kienet nobbli u dixxendenti ta’ Charlemagne. Mietet fil-grotta tagħha u sabuha xi 500 sena wara. (Tgħid mietet bil-ġuħ?) Meta kien hemm il-pesta f’Palermo fl-1625 hi dehret lil wieħed u dan mar sab l-għadam tagħha (kif għarafhom?!) u dawwruhom mal-belt fl-14 ta’ Lulju u l-belt inħelset. U b’hekk inħatret il-patruna tal-belt.
Morale della storia: erm... boq. Tmurx tgħix waħdek ġo grotta għax jindunaw li mitt 500 sena wara! Apparti ċ-ċajt, is-sejħa għall-qdusija u għall-initimità ma’ Alla hija miftuħa għal kulħadd, anke għad-dixxendenti ta’ Charlemagne!

U jekk tkun Palermo fil-festa... gawdiha!

-304 San Girgor il-Kbir, PM

Girgor kien iben xi kmandant Ruman u qaddisa Rumana. Kellu żewġ zijiet qaddisin ukoll. Bużnannuh kien papa! U qaddis għal ġieħna! Ġie edukat mill-aqwa għalliema li kien hemm f’Ruma fis-seklu sitta. Biegħ kullma kellu, bidel id-dar f’monasteru benedittin, u uża l-flus biex bena sitt monasteri fi Sqallija u wieħed f’Ruma. Ra xi tfal ingliżi qed jinbiegħu bħala lsiera f’Ruma (il-leġġenda tgħid li ħasibhom anġli!) u sar missjunarju għall-Ingilterra. Mhux mar hu, imma bgħat in-nies. Sar Papa fit-3 ta’ Settembru 590, l-ewwel reliġjuż li rċieva dan l-unur. Matul il-pontifikat tiegħu ġabar diversi innijiet u xerridhom mal-Knisja kollha, b’hekk baqgħu magħrufin bħala Kant Gregorjan. F’kitbietu jidher bniedem umli ħafna. Fl-Uffiċċju tal-lum jikteb dwar il-ħtieġa li jara li (avolja kontra qalbu) joħroġ mill-isfera tal-kontemplazzjoni biex jifhem il-bżonnijiet tan-nies! Miet fis-sena 604.

Lezzjoni: Li tkun Papa ma jfaqqfekx milli tkun missier għal dawk li għadhom ma semgħux bi Kristu. Lanqas ma jwaqqfek milli tagħraf id-dgħufijiet tiegħek u tistqarrhom.

Madwar Ħ’Attard…

Għall-aħħar ftit ġranet tas-sajf (flok nibqa’ d-dar nitgħażżen) iddeċidejt li nibqa’ mmur sal-parrroċċa ngħtu daqqa t’id fejn ikun hemm bżonn… u l-kapo ġietu l-idea li jagħmel mappa tar-raħal kollu, triq triq b’kull dar. U ġejna delegati li nagħmluha jien, abbati u oħtu.
Kellna laqgħa ta’ orjentament magħmul mill-Ms fit-8:30 (erm.. il-bieraħ kien hemm il-programm tal-banda fiż-Żurrieq u veru m’għandix idea kif irnexxieli nqum). Wara morna għall-quddiesa (kemm aħna tfal BRAVI) u mbagħad beda x-xogħol. Għamilna Triq il-Kbira (li m’hix daqshekk kbira), Triq San Anton (omg) , Triq Lord Strickland, Triq Birkirkara, nofs Triq Oscar Testa u Triq il-Mitħna (OMG). Din ta’ l-aħħar għandha forma ta’ T bil-maqlub (ie sieq qasira u linja TWILA). Ma nafx minn mindu ‘l hawn toroq hekk ikollhom l-istess isem! Bqajt impressjonat ukoll bin-numru ta’ djar bla numru u bla isem… jew il-pustiera jħobbu jagħmlu s-somom, jew inkella tattika tajba biex la tħallas kontijiet u anqas tirċievi aħbarijiet ħżiena. Doqna wkoll x’jiġifieri meta jkollok it-taħwid fil-konfini.. ħin minnhom spiċċajna Ħal Balzan bla ma ndunajna! Għamilna madwar sagħtejn. Ħadt pjaċir avolja x-xemx kienet miċidjali.

-307: San Aidan

Qaddis Irlandiż tas-Seklu VII. Wara li għamel xi snin Isqof ta’ Clogher, irriżenja biex sar monaku f’Iona Kien ħabib tar-re Oswald li talbu jagħmel xoghol missjurnarju f’Northumbria, fl-Ingilterra. Episodju magħruf huwa meta xi pagani attakkaw il-belt ta’ Oswald u dawwruha bil-ħatab biex jaħarquha… Aidan talab lil Alla, ir-riħ dar u l-fjamm ħarqu lill-għedewwa minflok! (Forsi nistgħu nitolbuh meta jkun riħ isfel ħalli jdur ir-riħ u jispiċċa t-tidlik?)
Aidan baqa’ magħruf ħafna għall-għarfien li kellu tal-Bibbja, il-kapaċità li kellu fl-omeliji, il-qdusija tiegħu, il-ħajja sempliċi li kien jgħix, il-karità li kien jagħmel u l-għerf li kellu. F’Lindensfarne waqqaf monasteru li ma sarx biss ċenru spiritwali, imma wkoll depożitu tal-letteratura Ngliża fis-snin mudlama. Bis-saħħa tiegħu baqgħu jeżistu l-aktar opri letterarji antiki ta’ din il-lingwa. Miet fis-sena 651.

Lezzjoni: Anke meta kollox jidher mitluf, itlob lil Alla, li kapaċi juri qawwietu anke f’xi ħaġa normalissima, bħal ngħidu aħna t-tibdil tar-riħ f’waqtu!

-309: il-martirju ta’ San Ġwann Battista

Naħseb li Ġwanni l-Battista, il-prekursur, huwa l-uniku qaddis li l-Knisja tiċċelebra t-twelid u l-mewt tiegħu. Dal-għodu kont qiegħed għall-quddiesa Ħ’Attard u Dun Ġorġ qal kelmtejn li veru laqtuni: Erodi huwa magħruf bħala sultan ħażin u kattiv u korrott u midneb u żieni eċċ, madankollu anke lilu Alla pprovdielu ċans biex jikkonvertu u jindem minn ħtijietu. Dan għamlu permezz ta’ Ġwanni.
Erodi però ħalla żifna tagħmih, u l-bqija it’s history.
Lezzjoni: Minkejja l-iżbalji (anke serji) li nieħdu, Alla xorta jibqa’ jibgħatilna l-messaġġiera tiegħu biex juruna t-triq. J’Alla ma noqtlux il-leħen ta’ Alla li hemm fina u li jista’ jkellimna permezz ta’ dawn il-messaġġiera!